قورقودرلر انلر دخى خوف حياة و جاندن از دل و جان اه و زارى و ناله ايتدكلرنده حضرت ايزد منان و اول حى مستعان انلرك نادانلغله ايتدكلرى كناهلرينه باقميوب باران احسان ايدر اكر انلرك دعالرى مقبول اولميوب ياغمور ياغمسه و باخود قحط اولسه و يا از ياغوب اكثر اشيا بهايه چقسه اول خراباتيلرك اكثريسن قتل و تلف ايدرلر فصل و كوى خراباتده اول قومك اولادلريچون معلم‌خانه‌لر بنا ايتمشلردر كه انده دختر مه پيكرلرينه سازنده و خواننده لك و پسر خورشيد فرلرينه رقاصلق و عجيب و غريب اويونلر تعليم ايدرلر و اول خورشيد روى سنبل موى پرىزاد و خور و انزادلر خيل خيل سازلرينى بويونلرينه حمايل ايدوب و صراحى و ساغرلرينى مدام مدام ايله صولديروب اللرينه الوب نظم جمله موسيقار زن بربط سراى * لحن داوودئ ايشان جان فداى نثر رقص‌كنان شور و شيوهء بىپايان ايله چوق چوق مانند قلندران چاك كريبان اولوب بازارلرده سيران ايدرك عشاقلرينك سيم و زرين و سائر امتعه و زيورين الوب تماشاى كلدسته قد و تازه كلبرك خدلريله عشاقلرينى دلشاد و پر نشاط ايدرلر اما خاندن علوفه خور اولان اهل مسند خراباتى دخترلر ايله صحبت و عشرت ايده‌مزلر اكر طوتيلورلر ايسه فصاحتدر ديو قتل اولنورلر خراباتيلرده تلف مال و منال ايدنلرك اكثرى اهل صرف و بازركانلردر و هر شهرده خاقان جانبندن عربه‌لر و معتمد كمسنه تعيين اولنمشدر كه مال و مناللرك خراباتده تلف ايدوب غايت فقر وفاقه دن بازار و محله‌لرده هلاك اولانلرى كتوروب دريايه اترلر زيرا مملكت خلقى اولاد و انسابلرى اول قباحته مالك اولمق خوفندن سياست قصد ايدوب اول كمسنه‌لره اصلا مرحمت ايتميوب بر حبه و بر ممكن اچلقلرندن هلاك اولورلر و بعضيلرى غايت فقرلرندن باشلرينه و بدنلرينه كهله دوشوب ايكيشر كمسنه بربريله اتفاق ايدرك خلق اوكنده دوكشوب ضرب مشتد ايله باشلرين ياروب و يوزلرين شيشررلر اوله كه دكانلرده اولان بازركانلر بر درهم مقدارى نسنه ويره‌لر و باوجود اوجوزلق بر مرتبه ده در كه بر درهم كموشه يتمش پول ويررلر و بريوله بر كاسه طعام ويررلر و بو اوجوزلغه كوره اول قومه ذره مقدارى مرحمت ايتميوب اصلا نسنه ويرمزلر بو سببدن ناچار اولوب هلاك اولورلر و اول اتفاق ايدن حريفلر غايت جوعلرندن صاحب دكان اولنلر حضورنده اولقدر حالات ايدرلر كه قتلدن غيرى مفارقته درمان اولميه و اكر اول ماللردن